«قانۇننىڭ تەكرارى»دا مۇسانىڭ موئاب زېمىنىدا ئىسرائىل خەلقىگە بەرگەن بىر قاتار يوليورۇقلىرى خاتىرىلەنگەن. ئىسرائىل خەلقى ئۇزۇن سەپەرنىڭ ئاخىرقى نۇقتىسىغا كېلىپ، كەنئان زېمىنىغا كىرىشكە تەييارلىنىۋاتاتتى. مۇسا ئىسرائىل خەلقىگە پەرۋەردىگارنىڭ سىناي تېغىدا دېگەنلىرىنى ئەسلىتىدۇ. بۇ ۋەقەدىن قىرىق يىل بۇرۇن، پەرۋەردىگار ئىسرائىل خەلقىگە كەنئان زېمىنىغا كىرىشنى بۇيرۇغان بولسىمۇ، لېكىن ئۇلار ئۇ يەردىكى خەلقلەردىن قورقۇپ، كەنئان زېمىنىغا كىرىشنى رەت قىلغانىدى. شۇنىڭ بىلەن ئۇلار چۆلدە قىرىق يىل سەرسان بولىدۇ. ئىسرائىللار ئىئوردان دەرياسىنىڭ شەرقىي تەرىپىدىكى زېمىنلارغا بېسىپ كىرىپ، ئۇ يەرلەرنى ئىگىلەيدۇ ۋە يەرلەرنى تەقسىملەيدۇ. موئاب زېمىنىدا مۇسا پەرۋەردىگارنىڭ قانۇنىنى ئىسرائىل خەلقى بىلەن يەنە بىر قېتىم كۆرۈپ چىقىدۇ ۋە پەرۋەردىگار بىلەن تۈزگەن ئەھدىنى يېڭىلايدۇ. كېيىن مۇسا پەرۋەردىگارنىڭ بۇيرۇقى بويىچە يوشۇۋانى ئۆزىنىڭ ئورنىغا يېتەكچىلىككە تەيىنلەيدۇ ۋە ئۆزىنىڭ ئىئوردان دەرياسىدىن ئۆتسە بولمايدىغانلىقىنى ئېيتىدۇ. خەلققە بېرىلگەن تاللاش ئەركىنلىكىنى چۈشەندۈرۈپ، ئەگەر ئۇلار پەرۋەردىگارنىڭ قانۇنىغا ئەمەل قىلسا، بەختكە ئېرىشىدىغانلىقىنى، ئەمەل قىلمىسا، قارغىشقا قالىدىغانلىقىنى ئېيتىدۇ. ئىسرائىل خەلقىگە بەخت تىلەپ دۇئا قىلىدۇ. شۇنداق قىلىپ، مۇسا خۇدانىڭ ئىرادىسى بىلەن موئابتا 120 يېشىدا ۋاپات بولىدۇ.
